[AbuNawaf] عروس تحت الطلب

شبكة أبو نواف
رسائل الجوال SMS
مجموعة ابو نواف رسائل المجموعة ملتيميديا وصلات خارجية الاعضاء إحصائيات

عروس تحت الطلب
كاتب الموضوع : أبو هديب بريد العضو : allmbe1@hotmail.com

للتعليق ولمشاهدة الموضوع بشكل افضل : http://www.abunawaf.com/post-7227.html

(( بسم الله الرحمن الرحيم ))

هدوء ألم بالمكان .. ذلك الهدوء الذي يجري بسرعة ليتصبب العرق من جبينه كي يصبح مثلا مشاعاً بين الناس ( الهدوء الذي يسبق العاصفة ) … ولكن في هذه المرة تفوقت العاصفة على الهدوء بدخول والدتي علي في غرفتي لأفاجأ أنا والهدوء الذي دخل بعدهما ليصاب بفزع جارف مما جعله يقفز في حضني من شدة الخوف لتزمجر والدتي وفي يدها قطعة حديده لم أتبينها بسبب كثرة الغمص المنهمر على وجهي كشلال استوائي لتقول لي وهي تلوح بها ( مثل ما يلوح راعي الحمام بشماغة فوق السطح ) .. ( ابو هديب ) نعنبو خيرك عمرك صار من أعمار قوم نوح عليه السلام وأنت ما بعد أعرست … يا خوفي أنك منحرف وأنا ما أدري

تثاءبت حتى أزلت خيوط العنكبوت من فمي لأجيبها بكسل .. بالله عليك وجهي وجه انحراف أنا المرة الوحيدة اللي حسيت فيها بطعم الانحراف يوم دقيت آخذ لك موعد في مستشفى الحبيب وردت علي بنت في الاستقبال … خرجت عينا أمي من مقلتيها وهي تشهق بصوت جعل الهواء يخشى أن يدخل في رئتيها لتقول بخوف وجزع .. يعني أغواك الشيطان وضعت يا ( أبو هديب ) كان قلبي حاس إن إيمانك بيضعف من يوم معد صرت تودي الملابس للمبرة … أشحت بوجهي متجاهلا حديثها لأقول لها من جدك أنت أضيع الإنحراف في هالزمن يبغى بطاقات شحن وعزايم في مطاعم وأنا ما عندي أبسط متطلبات الخروج عن طريق الصواب …

قاطعتني والدتي وهي تقول لي أجل أعرس عشان تحصن نفسك .. ابتسمت في وجهها ابتسامة تنم عن يأس كيأس عجوز تنتظر المحيض ( يسمع بالتشبيه ) لأجيبها .. وين الفلوس عشان نعرس الراتب وأنت شايفة من يوم ينزل تتقطع ياقة الثوب من كثر شد الديانة …وغير كذا أتوقع أن حنا العائلة الوحيدة في العالم اللي آخر من تعلم أن الفلوس يتغير شكلها بموت الحاكم ، تخيلي أمس كنت في البقالة جاء واحد حاسب بفلوس غريبه يوم سألت راعي البقالة يقولي هذي الطبعة الجديدة اللي عليها صورة الملك عبد الله الله يطول بعمره وأنا ماد يدي بفلوس الملك فيصل الله يرحمه ..

تقدمت مني بملابسها المرصعة بالورود الميتة والتي تساقطت لتتجمع في طرف ثوبها من شدة رائحة البصل .. ( كنها شجرة في فصل الخريف ) لتقول لي .. يا ولدي لازم تتزوج وحده تهتم فيك وتطبخ لك وتشيل عنا عقوبة غسيل ملابسك الداخلية .. صمتت قليلا قبل أن تكمل حديثها .. بس يا ولدي لا تضغط عليها بكثرة الغسل عشان ما تطلب الطلاق .. قلت لها بدون مبالاة .. خبرك عتيق يمه معد فيه بنات يغسلون البنت هالحين تبي تعرس عشان تقهر فلانه انها تزوجت قبلها وإلا وحده مكبوتة في بيت أهلها وصاكين عليها الين صارت مخلل وتبي العرس عشان تسافر وتطلع وتجي .. وإلا بنت تبي تعرس عشان تفتك من أختها اللي تلبس ملابسها وتشاطرها غرفتها وأدوات مكياجها ولو سألتيها بتقولك ودي أعرس لأني تعبت كل ما جيت أغير ملابسي أصرف أختي وإلا أغير ورى الباب وطول الوقت تقولها لا تناظرين وهذيك ترد عليها هاه خلصتي ترى بلتفت ما أبي أشوفك وتحوم كبدي ..

تأففت والدتي وهي تجيبني .. وش لك بكثر الهرج انت عطني الشروط عشان أدور لك وتفاول خير نبي نفرح فيك لو على حساب تعاسة البنت اللي بتاخذك .. تطلعت إليها بنظرات خاوية وأنا أجيبها .. أبيها بيضاء وطويله وشعرها ناعم وعيونها كبار وخشمها سلة سيف وشفايفها مرسومه وفمها مثل خاتم سليمان .. قاطعتني والدتي بتردد معك صورة لخاتم سليمان عشان إذا جينا نخطب نحطه على فم البنت ونقوسه … تجاهلت حديثها لأكمل حديثي .. أبيها رشيقه وخصر ورزه وبينما أنا استطرد في المواصفات كانت والدتي تتلفت يمينا ويسارا لأقطع حديثي وأسألها .. وش ادورين يمه ..

أجابتني وهي منهمكة في البحث .. ادور مرايه عشان تشوف وجهك قبل ما تسترسل في شروطك هالتعجيزية هاللي غثيتونا فيها يا الرجال تحسبون انكم داخلين الجنة مهوب على سطح الأرض ، تتشرطون ولا تشوفون وجيهكم .. قاطعتها .. قبل أدورين مراية يا مرفت أمين تراني اشبه لأبوي .. امتعضت حتى كادت أن تخرج معدتها من فتحات رأسها قبل أن تشيح بوجهها لتجيبه .. ومن زين أبوك هاحلين اللي من عرفته وهو يمضغ على الجهة اليمين لدرجة أني كنت أحسبه يتبع السنه ألين جاء يوم وضحك مالقيت ولا ضرس في الجهة اليسار عقبها عرفت ليش يمضغ على هالجهة ..
وكله كوم ويوم يجي يخطبني كوم ثاني ..

كنت بنت بنوت ما بقى ولا واحد في الحارة ما تغزل فيني .. جانا أبوك وطلبني ودفع مهري تنك زيت وأبوي يسأله ليش عاد تنك زيت .. ويجاوبه أبوك الزيت مهوب مهم يا عمي المهم التنك الحديد لأني حالم أن الطن بياصل بعد عشرين سنه إلى أربعة آلاف ريال عشان كذا جمع هالتنك وأنا أي حديدة أشوفها طايحة أبجيبها لك عشان أن بعتهم في المستقبل على شركة سابك يغطون المهر ..

ورد عليه أبوي ليش تبي تتزوج ورى ما تفتح لك ورشة حدادة بدال ما تبعثر فلوسك .. رد أبوك رد بعثر مشاعيري وأحاسيسي وخلى زهرة شبابي تذبل مثل ما تذبل الورود المستبسلة في الوادي المقفر .. تطلعت إليها بتعجب لأقول لها .. يمه الكلام اللي قلتيه قبل شوي بينزل كلمات متقاطعة في العدد الجاي من جريدة الرياض …

صمتت قليلاً قبل أن تقول لي وهي تومئ برأسها والحنا يتنثر في أرجاء الغرفة .. خلني وأنا أمك أعبر وأطلع الجمر اللي في قلبي .. تأثرت لكلماتها وأنا ألوح بيدي .. خذي راحتك يمه بس لا تهزين راسك بقوة عشان ما يطيح هالدمن اللي عليك وطلعي الجمر من قلبك وحطيه على راس الشيش وإلا جمعيه في منقد عشان نشوي عليه .. لم أكد أنهي كلماتي حتى رمتني بحذائها البالي لتستطرد قائلة

قال أبوك هذا المشروع اللي في بالي بس قلت آخذ بنت الحلال اللي تعيني على جمع الحديد بعدها راح وجاء مرة ثانية وجاب معه درزن صابون أبو عنز حتى العنز المرسومة على عليها جالسه في طرف الصابونة تحك ظهرها شكلها كانت جربانة … ابتسمت وأنا أجيبها شوفي يمه مسألة التنك عرفناها ولو أني اتوقع أن هدف أبوي من تنك الزيت هو الزيت نفسه عشان شعوركم خشنه لأن لو تفكيره حديد كان جمع شعور روس خوالي وباعها .. أما بخصوص صابونة أبو عنز أتوقع ريحة أباط خوالي هي الدافع الأساسي لجيبة الصابون إذا صار الجرذي نفسه من يوم يشوف خالي يخش في باطه يحسبها ماصورة صرف صحي ..

أمسكت بأذني وهي توبخني .. تأدب هذولي خوالك بعدين يكفيك فخر أن خالك ( سعد ) مهندس طيران .. تأففت وأبعدت يدها عن أذني مقاطعاً حديثها .. مصدقة أنه مهندس طيران آخر مره جيتة لقيته حاط فوطة حمراء على كتفه وجالس يغير زيت الطيارة حتى ما يعرف وش نوع الزيت يسأل الكبتن وش تبي نحط لك الزيت سوبر شل والا سوبر جيتي ولا أردى منه الا الكبتن يقوله حط سوبر مان .. وإلا خالي الثاني جلس عشر سنوات يراجع دكتور الأذن والأنف والحنجرة ويقوله أنا أطرش يا دكتور ، كل ما شغلت أغنيه ما اسمعها ويعالجه الدكتور ويتعب معه وآخر شي اكتشف أن سماعة المسجل هي اللي خربانة ..

وإلا خالي الثالث شكله يحشش تدق عليه زوجته تقوله أنت سندنا أنت العالم كله وهو يرد عليها الله يسلمك ويعافيك هذي مسؤولية كبيرة ورميت على عاتقي اني اشيل العالم وأحل محل الأرض فترة .. أكيد بتكون مسؤولية أني أجلس أدور بالعالم على نفسي ، وأدوربه على الشمس وشغله وفصول اربعه وليل ونهار … لكن أن شاء الله أني أكون قدها … أنا ما أدري من طلعت عليه عبقري مع ان الظروف المحيطة بي تساعد على قتل خلايا المخ … المفروض الدولة تمنع جلوس خوالي مع الناس لأنهم اخطر من الحشيش على العقول البشرية ..

تجاهلت والدتي حديثي لتعود بنا إلى سيرة الزواج لأقول لها بعد تردد .. يمه أنا ما عندي مشكلة أتزوج بس ما أبي انتم تختارون لي لأني بصراحة ما أثق في ذوقك ولا ذوق أختي اللي كل شوي ناطة وخاطبتلي وحدة من صديقاتها كله عشان تجي صديقتها عندنا في البيت وتسكن معنا وتقابلها كل يوم … ليتك تسمعين وصفها لصديقاتها أتوقع لو تسمعينها بتغرقينها في الخزان ألين تصير مخلل .. وإلا نظام كل ما جيتوا من زواج جلستوا تمدحون فلانه وفلانه وهذي تهبل وتجنن وتتركون

العرس وتسعون تسألون عن البنت وعن رقمها وفصلها وأصلها وتجون تغثوني آخر الليل هاه نخطبها لك ..

ترددت بعدها للحظات لأجمع جأشي كي أكسر حاجز التردد الذي ما إن رآني هممت بكسرة حتى أبتعد عن طريقي كي لا يتحطم لأقول بصوت هادئ .. وبعدين يمه أنا حاط عيني على إنسانه في بالي .. تقدمت والدتي أكثر حتى كاد وجهها أن يمتزج مع وجهي لتقول لي .. من هذي الحقيرة اللي ما عندها نظر وتعرفت عليك .. هذي وحدة صايعه لأنها مثل ما تعرفت عليك بتتعرف على غيرك … تراجعت إلى الخلف وأنا أرفع أصبعي مقاطعا إياها .. يمه ترى هالنظرة الضعيفه اللي من الستينات سوو لها تشتطيب وبعضهم حط لها عدسات وتغيرت .. نظرة أن البنت إذا تعرفت على واحد تصير صايعة يمكن الله يجمع بينهم بكل خير ويتزوجون ..

وبعدين أنا أحبها وأحس أن سعادتي معها لأنها فاهمتني .. قاطعتني والدتي والحنا ينساب من خلف أذنها لتقوم بوضع مناديل لتسد فتحات التسرب .. أنطم بس جالس تغرر ببنات الناس بسم الحب وتتسلل بخفة الثعلب المقيت إلى قلوب العذارى ..

تطلعت إليها بدهشة وأنا أردد كلماتها .. أغرر .. وأتسلل .. ومقيت ،، أخاف تبين تقولين أتغرغر .. أشاحت بيدها لتستطرد قائلة .. اللي هو أهم شي أنك حيوان .. زفرت زفره جعلت والدتي تحرك بيدها أمام وجهها لتشتت الهواء المنبعث لتقول بقرف الله ياخذك وش ريحة هالشراريب اللي في حلقك عسى بس منتب تشرب خمر ..قاطعتها بحسرة .. أنا معي فلوس آكل عشان أشرب إلا كان تسمين هالكمون اللي تشربيناه كل يوم عن العين شراب هذا شي ثاني .. تأففت لتقول لي ..

كمل كلامك وإذا حسيت بكسر في رجليك ترى سبب الكسر أنك طحت من عيني … آخذت أجول في الغرفة دون أن أسمع كلماتها الأخيرة وأنا ألوح بيدي بطريقة رومنسية حتى ضربت الثريات المعلقة في السقف وأنا أقول.. أحبها وأبي أتزوجها .. أمانه يمه ما لاحظتي علي شي هالايام أني طايح في كتابة الشعر والأوراق مبعثره … أجابتني هالاوراق أزين ما في غرفتك قبلي آخذ منها وأنظف بها القزاز وياليت ما ترميها نحتاجها في رمضان عشان زيت السمبوسة .. تراجعت قليلا بقلب منكسر وأنا أرد عليها .. معقولة يمه تنظفين القزاز بإحساسي ..

تجاهلت سؤالي بكل احتقار لتقول لي .. المهم وأنا أمك بخصوص هالموضوع لا يدري عنه أبوك لأنه بيغرقك في الخزان وبتطب علينا الهيئة ثاني يوم يحسبونا جالسين نسوي خمر وتنزل صورنا بكره في الجرايد وما يصدقون أن حنا سعوديين ويكتبون تحت الخبر تم القبض على بنقالية يقومون بقطع الخمر في أحد البيوت السكنية .. تراجعت وأنا أصرخ بأعلى صوتي .. يمه خله يغرقني في الخزان .. خله يقطعني إلى أربع وصل بس أبيه يعرف شي واحد أني أحب هالبنت ومستعد أموت عشانها لاني لقيت فيها الأنسانه اللي تفهمني وتفهم مشاعري ..

شوفي وجهك يمه معرعر وأنت توك صغيره المفروض اللي في عمرك تركض في حديقة وتقطف الزهور ..تنهدت لتردد بصوت خافت وهي تتحسس وجهها .. إيه والله أبوك قصر بعمري معد صرت اعرف شكلي في المراية ، خلاني بدال ما أقطف الزهور صرت أقطف الملوخية في المطبخ .. تقدمت منها وأمسكت بيديها وأنا أقول بصوت هامس .. ودك أكون إنسان تعيس وأحط الحنا مثلك عشان تلقين عذر ما ينام معك في السرير .. ترضين أجلس ادور في البيت كني سابح في طين
أمضيت فترة في إقناعها ولكنها أبت أن تقتنع لتقول لي ..أنطم ، أن سمع أبوك كلامك بيربط لسانك في شبك الحديقة ويجيب ريشه ويقلبه وتر ويجلس يعزف عليه ، وبعدين لو في البنت خير ما تعرفت عليك من ورى أهلها وإذا بغيت تتزوج ما عندنا شي أسمه تختار أنت حنا في مجتمع فيه عادات وتقاليد مهوب في مطعم تدخل تطلب اللي تبي …

تأففت لأقول لها أي مجتمع اللي تتكلمين عنه اللي الخطابة فيه هي سيدة الموقف تشربك العوائل في بعض تمدح في عائلة وتخفي عيوبهم عشان تاخذ لها كم قرش ولو تشوفين شكلها كنها فرن حمولة بخمس عيون .. وإلا أم وبناتها تتصيد لولدها بنت في أحد الزواجات وتنشب في حلقها من أنت بنته وعطيني رقمك وتروح عند ولدها وإلا أخوها وتغثه لقيت لك وحده قمر وااااو ..

طيب هالقمر وش أخلاقها ووش نفسيتها أنا ما أبي جسد وبس أبي الروح هل هي تتواكب مع روحي وإلا لا … هل نفسيتها مطابقة لنفسيتي يمكن أنا عصبي وهي عصبية ، يمكن تكون رومنسية وحالمة وأنا إنسان واقعي وجفس قاطعتني والدتي لتقول لي .. يا جعل يوقع فوق راسك غراب ويلتحم معه ويصير كنه قبعة الحرس الملكي البريطاني …

تجاهلتها مستطردا حديثي .. وغير كذا عندنا عادة لو جيت تخطب عشرين أخو يركبون في سيارة وحده كنهم عفش عشان يروحون معك وتلقين أهل العروس متوهقين ما عندهم الا ست كيسان لدرجة أن أم العروس تقول للأبو شف إذا شربوا جب الكيسان عشان نغسلها ونصب للباقين … والأبو يهز براسه كنه نعامة من ضيقة الصدر والسبب بيته صغير ما يدري كيف يخلي العريس يشوف بنته من كثر عدد اللي جايين وصافين ببشوتهم في المجلس كنهم في مجلس الوزراء ..

يضطر يطلعهم ويا بشوتهم في الحوش ويوريهم الخزان ويخلي ولده يدخل أخته على العريس ومن يوم تخش وهي منزله شعرها على وجهها ولابسه كعب وتجلس في آخر كرسي جنب الباب ولا يمديك تشوف شي والسبب أن واجهة بيتهم غربيه الشمس تسطع في عيونك مع الدريشة .. وأخوها يسولف فوق راسك ما تدري أنت تشوف وإلا تسولف وإلا تصد بوجهك عن الشمس كنك في الصمان مهوب في مجلس.. وتقوم وتخليه وتقعد في حيرة وتقولهم على بركة الله ..

وإذا تزوجتها تكتشف انك متزوج شكل بس مختلفين في الأرواح والطبايع ومع الوقت تصير مشاكل وتشيل أمك يدها عنك ولا كأنها قادتك لمذبحك وأم البنت تدور عذر وتقول بنتي منضوله .. وإلا الولد منضول بدون ما يفكرون أنهم خطبوا جسد بس بدون ما يشوفون الروح وإلا يسألون عنها ..
أنا أبي الإنسانه اللي اخترتها وكلمتها وعرفت طبايعها … وبينما أنا أتحدث خرج صوت أجش من خلف والدتي لأقول دون شعور مني .. يمه بتتحولين ورى صوتك خشن .. لم أتم عبارتي حتى برز طرف شنب أبي من خلف والدتي ليقول لي …

وش هالكلام اللي أسمعه حب وخرابيط حنا ماعندنا هالأمور الحرمة أداة وليست وسيلة .. أشحت بوجهي وأنا أرد عليه .. كلها نفس المعنى بتقنعني أن الاداة تختلف عن الوسيلة .. قاطعني وهو يجيب بغضب .. المهم الحرمة لنسل الذرية وسكن للرجل وتطبخ له وتزين أموره والحب يجي مع الوقت أما حب هالمسلسلات وهالأفلام اتركه عنك انت من يوم بديت أتابع مهند ونور ولميس وأنت حالتك مهيب عاجبتني حتى أمك خربتها صارت ترسل على جوالي رسايل حب ..

تثنت والدتي عندما سمعت كلماته ليضربها على كتفها بطرف أصابعه موجهاً حديثه لها .. أقول لا ترسلين ترى أنا اللي اسدد فواتير جوالك وإذا عندك كلام حلو بتقولينه تراني ساكن معكم في البيت مهوب برى تعالي وقوليه لي بدال هالخساير ( ابو التحطيم ) .. وضعت والدتي يدها على فمها بطريقة دلع لتدفع والدي وهي تركض خارج الغرفة والدموع تنساب منها ليقول والدي .. هاه شف هالمشهد مسروق من فلم رد قلبي حق سعاد حسني …

تنهدت قبل أن أقول له .. يبه العالم تغير انفتح معدوب مثل منول على اياكم كان الواحد كأنه في بير لحاله ما يشوف الناس حوليه ويحس نفسه أنه سعيد لكن هالحين في ضل الطفرة والتطور طلعت الدشوش والمسلسلات والأفلام والانتر نت والثقافات صار العالم مفتوح والمقارنة جاريه والتواصل بين الطرفين شبه مسموح عن طريق وسائل الإعلام والأنترنت .. ليش ما نستفيد من التقنية ونسخرها لصالحنا ونخفف نسبة الطلاق بين الطرفين .. على الأقل ما نظلم البنات لأنها لما تحمل لقب مطلقة فرصتها في الحصول على زوج مناسب ضئيلة عكس الشاب اللي يطلق ويروح يا خذ بنت بكر وجمال وجاه وكل شي حلو فيها والبنت المطلقة تاخذ لها واحد عنده عيال وإلاشايب وإلا إنسان فيه عاهة ونادر ما تحصل على فرصة زواج ثانيه حلوه ..

أشاح بوجهه وهو يجيبني … هذي كلها خرابيط مافيه حب قبل الزاج السعادة الحقيقية تجي بعد الزواج مع الوقت والعشرة … وقفت وقفة جسور لأقول بكل ما فيني .. يبه أنا أحب إنسانه وما أبي اسمي يرتبط بغيرها لو أرمي نفسي من السطح .. تطلع إلي وقال .. قلي الوقت اللي بترمي نفسك عشان افتح لك باب السطح ولا أخليك تاخذ وحده غسلت مخك بكم كلمة وهي مع ألف واحد غيرك .. تنحنحت وقلت يبه أنا قلت أحب انسانه مهوب مجمع الراجحي عشان تقول ألف واحد ..

زجر في وجهي حتى بنات أسنانه الذهبية وكأن فمه منجم ذهب ليقول بصوت هادر .. اسمع الحرمة اللي بنزوجك أياها عندي بنت جارنا وصديقي ( مهمل ابن جدوع ) .. اقتربت منه وقلت بكل ازدراء أسم أبوها مهمل ليش هو ما كان يحل الواجب وسموه بهالاسم .. تطلع إلي للحظات قبل أن يجيبني الرجال ما يعيبه لا شكله ولا أسمه يعيبة مخباته وأبوها كاش ومن عائلة محافظة ومرموقة وأنت أن شاء الله تكون هالبنت من نصيبك .. هممت بالحديث ولكنه أوقفني بإشارة من يده ليقول لي .. اقطع وأخس خلاص الكلام في هالموضوع انتهى ..

جهز نفسك بكره بنروح نخطب وأحلق شعر دقنك هالمطشم كنك واحد من هالمطلوبين اللي يطلعون في الجريدة .. تجاهلت حديثه ليخرج ويدعني لوحدي أقوم بترجيف الأثاث الذي سمعته يئن ويقول .. وش دخلنا حنان تحط حرتك فينا رح رجف أبوك .. هدأت بعد فترة لتسترخي أعصابي وأدخل
على الماسنجر من جهازي المتهالك الذي امتلئ كيبوردة من فتات سمسم الشابوره ( ما عندنا وقت ناكل طبخ من أدمان النت ) .. أخذت اتحدث مع الفتاة التي رف لها قلبي وخفق لها فؤادي وردد لساني أسمها لأنقل لها معاناتي ولتجاوبني بالبكاء وببعض من عبارات التضحية ( الله يوفقك وين ما تروح .. الحياة ما توقف علي أنا يا حبيبي أهم شي أمك وأبوك ) .. لأقطع جو الرومنسيه بقولي . تعرفين تاكلين تبن هالحين أقولك أنا واقف في وجه أهلي مستحيل أتزوج غيرك وأنت تتخلين عني أشوى أن الهيئه مهيب ماسكتنا وإلا كان قلتي تراه خاطفني …

قالت لي ( أبو هديب ) لا تفكر أني مبسوطة ببعدك عني قلبي يتحطم من جوى ويعلم الله أني جالسه أبكي دموع .. قاطعتها مضيفا على الجو بعضا من المرح .. أكيد تبكين دموع مهوب بنزين وإلا كان قلبنا وجهك محطة وقود ..

ابتسمت كعادة أي فتاة على المسن تضع هاءات بلا حدود لدرجة أن حرف الهاء يمسح من الكيبورد من شدة الضغط عليه ( هههههههههههههههههه ) لأجيبها .. شوفي يا ( ريم ) أنا مستحيل أتزوج غيرك حتى لو زوجوني أهلي بنت وعطوني عليها عرض بنت ثانيه مجاناً يستحيل أفرط فيك .. ابتسمت وهي تجيبني .. وين أنت متزوج علبة لبن وإلا آدمية .. هذولي أهلك هم اللي بيدومون لك وأنا حي الله بنت تعرفت عليها من خلال النت .. قاطعتها بقولي .. أنت مو حي الله بنت واللي يقول عنك كذا أقص لسانه فلا تقولين عن نفسك كذا عشان ما أقص لسانك .. أنت خليتي للنت طعم ثاني صرت أخش عشانك وانفض همومي عندك وألقى فيك متنفس لمشاكلي ..

إنسانه فاهمتني وعارفه متى أزعل ومتى احزن ومتى افرح وكيف تهديني وأنا عارفك وعارف نفسيتك .. ليش أتزوج من إنسانه ما تفهمني ولا أعرف عنها شي .. أفضل أني أتزوج من وحده تعرفني وأعرفها على أني اتزوج من وحده أقضي حياتي كلها معها في مشاكل .. وصدقيني لو ما حصلتي لي زوجه .. فأنا أقولها لك وبالصوت العالي .. اعتبريني عزوبي إلى الأبد ألين الله ياخذ أمانته .. عزوبي عايش على ذكراك .. أتذكر فيها كل لحظة حلوه قضيتها معك وكل بسمة تراقصت على محيانا ..

همت بالحديث ولكني قاطعتها بكل صرامة .. كلمة وحده ابيها ترن في أذنك … احبك .. احبك من كل قلبي يا بعد الدنيا ومستحيل أعيش مع أي بنت غيرك حتى لو كلفني هالشي حياتي نفسها ..

* * *

وصلت إلى هذا الجزء من المشاعر في الكتابة لأسمع خطوات تصدر بخفوت من خلفي لألتفت وأشاهد صديقي الذي قال لي بصوت متهالك ..
إلى هالحين تكتب مذكراتك يا ( أبو هديب ) وأنت في هالعمر .. لم يكد يلقي بكلماته حتى أغلقت الدفتر لألتفت إليه وأجيبه كيف تبيني ما أوثق أعظم قصة حب عشتها وخصوصا أن عمري راح كله عشان أوفي حبي ووعدي لها …
جلس صديقي بجانبي وهو ينظر إلى جدران الغرفة ليقول لي .. من يوم خشيت دار المسنين وتعرفت عليك نادر ما أشوفك تطلع من غرفتك .. تنهدت لأجيبه .. الحياة بالنسبة لي تساوت معد صار لها أي طعم ولون من بعدها .. هي كانت الألوان اللي تمتع عيني والفرح اللي يحتوي قلبي والأداة اللي تزيل همي وتجلي حزني ..

نهضت والروماتيزم قد أجهز علي لأسير في الغرفة وأجلس على الكرسي الهزاز مقابل النافذة لأكمل حديثي بعد تنهيدة حملت الألم والحسرة .. تدري عشرين سنه من يوم افترقنا ما عمري يوم واحد نسيتها … بدت قصة حبي معها عن طريق النت تعرفت عليها في منتدى كنت أكتب فيه هبال وضحك وجد همي أني أسعد الناس اللي حولي ..

وفي يوم جتني إضافة على الماسنجر وسألتها من معي قالت لي بحدة يهمك تعرف .. قلت لها إذا كانت معرفتي لك بتضايقك مهوب لازم من عقبها جلسنا نسولف بشكل جدي وهزلي لفترة طويلة وشوي شوي ومع الوقت ارتاحت لي وقالت لي أسمها ( ريم ) وصرت أخش النت عشانها الين ما جاء الوقت اللي صرحت فيه بحبها لي وصرحت بحبي لها وكسرنا الحاجز وقوت العلاقة بينا وصرنا نجلس بالساعات وما يفرقنا إلا وقت الدوام والنوم ولكن مقيولة الشي الحلو ما يدوم ما زلت أتذكر إصرار أبوي على زواجي من البنت اللي يبغى وأنا أرفض وأقوله أبي أتزوج من الإنسانة اللي حبيتها لدرجة أنه احتد النقاش بينا وتركت البيت ورجعت له بعد فتره تحت إجبار إخواني وكسبت رضا أبوي وشرطت عليه إني معد أبي أتزوج يوم دريت أن حبيبتي تزوجت بإجبار أهلها عشت على هالحال لسنوات ألين تقدم بي العمر وصرت ألقى صعوبة في تلبية طلباتي والناس اللي حولي انغمست في مشاكلها وهمومها ومعد يهمها إلا نفسها وبس اتخذت قرار أني اخش دار المسنين عشان أحصل من يرعاني وفي نفس الوقت أقدر أعيش أحلى لحظاتي معها بدون أي أزعاج يشتت انتباهي لأنها يا ( عبد الله ) هي أول حب في حياتي .. والحب مثل النفس لازم تاخذه في كل وقت ..

أخذت نفسا عميقا بعدها لأقول بحسرة كادت تقطعني من الداخل .. ليت الأهل يحسون بمعنى الحب وكيف أنه سبب أساسي في نجاح أي حياة زوجيه ..
أغلقت عيني وسرحت مع من خفق لها قلبي ومن ضحيت لأجلها متناسياً كل شيء حولي ..
حلقت مع الإنسانة التي ملكت مشاعري وكل ذرة من كياني .. همت مع محبوبتي ( ريم ) دون أن أشعر بأي لحظة ندم على تصرفي الذي اقترفته .. فما صنعته ليس إلا شيء بسيط جزاء حبها لي وحبي لها ..

أنا الآن مستريح ..
ما دام حبك ينعش قلبي وينسيني عبارات التجريح
فخذيني إلى أي مكان تشائين أيتها الريح ..
لأن الشيخوخة حملت سلاح الزمن وأخذت تطعن فيني بشكل صريح
وأصبح الأمر سيان بالنسبة لي بين الحياة أو أن أكون ضريح

{ النهــايــة }
القصة من محض الخيال ولكنها حقيقة على أرض الواقع يعيشه أناس غيرنا وليس بالضرورة أن تكون جزء من واقعنا ولكنها جزء من إحساسي بالغير ..
( لحد يجي يقول بالله كم عمرك ومنهي ( ريم ) .. )
تنويه الموضوع مثل ما قلت خيال والكلام عن الشخصيات في الموضوع متعلقه باليوزر ابوهديب وليس بالكاتب نفسه

مدونتي على هالرابط
http://www.mammh.com


للتعليق على الموضوع او مشاهدة التعليقات الاخرى : http://www.abunawaf.com/post-7227.html

للاشتراك ضع بريدك هنا:

للمشاركة قم بإرسال مشاركتك على البريد التالي :
abunawafgroups@yahoo.com

بيتزا إرا Pizza Era
وسائط أبو نواف


شاهد في اقسام الملتيميديا أيضا
فيديو - مقلب بشرطي
مقلب بشرطي
بلوتوث - ادث على جسر الملك فهد
حادث على جسر الملك فهد
صور - اسن ل لشقاوه الاطفال
احسن حل لشقاوه الاطفال
صور - اسم كتاب
اسم كتاب
صور - أعطيناه فر
أعطيناه فرح
اقسام الملتيميديا

العاب فلاش | ملفات | مقاطع بلوتوث | صوت | صور | فلاش | مقاطع فيديو | منوعات


مواضيع أخرى لكاتب الموضوع أبو هديب
:: خلايا ضايعه من المخ ::
لطيفه عطيف
زوجوني من فتاة قبيحه
زومــــــــات


اخر عشر مواضيع ارسلت للمجموعة
صور : لو يعطوني فلوس ماوقفت عند هالاشاره
تقرير: افضل مطارات العالم لعام 2008
صور : أفخم مبنى لنادي سعودي
رحلتي الي شرم الشيخ – ج1
صور : تصوري .. مره نسيتك وإبتسمت ..!
صور : معرض الظهران الدولي الثاني للسيارات المعدلة , ج2
حرف “الدال” في السعودية يعني تخلف..
نظرية داروين الوظيفية !
نداء لأهل القلوب الرحيمة – تبرع
صور : ماكسيما ولا بي ام دبليو ؟؟
شبكة ابو نواف 2000-2007
قوانين الشبكةالخلاصات RSSالملف الصحفي

__._,_.___

للإشراك أو إلغاء الاشتراك أو معرفة تفاصيل إضافية عن المجموعة :
http://www.AbuNawaf.com
————————-
لإلغاء الاشتراك أرسل رسالة فارغة للبريد لتالي
AbuNawaf-unsubscribe@yahoogroups.com
وسوف تأتيك رسالة تأكيد الإلغاء قم بإعادة إرسالها
————————-
المكتبة الصوتية للقرآن الكريم
http://www.mp3quran.net
————————-
موقع رياض القرآن
http://www.ryadh-quran.net
————————-
رسول الله
http://www.rasoulallah.net/
————————-

Recent Activity

Visit Your Group

Star Wars on Y!

Discover new content

Connect with other

fans & upload video.

Moderator Central

Yahoo! Groups

Get the latest news

from the team.

Health Groups

for people over 40

Join people who are

staying in shape.

.


__,_._,___